قصه حقيقيه ....اقدمها هديه لفخامه الرئيس محمد حسنى مبارك







مصير المصريين حاجه من حاجتين ياانتحار ياموت فى طوابير العيش وملحقاتها (طوابير التموين واصدقائها)
كان بطل قصتنا (الحقيقيه )يعمل فى الاعمال الحره اى انه (صنايعى ) يعمل باجر ثابت
يوميا وكان اجر عمله 10جنيهات يوميه وبعد ان انتهى بطل القصه من عمله ذات يوم توجه
الى بيته قالت له زوجته انه لايوجد طعام فى البيت ونزل الرجل بالعشره جنيهات ليشترى
طعاما

وتوجه الى المحل القريب من منزله وطلب من البائع زجاجه زيت وسرعان ما قدمها له
صاحب المحل لكنه فجعه بسعر الزجاجه عندما قال له انها بعشر جنيهات اى انها بأجر يوم
كامل من الساعه الثامنه الى الساعه السادسه مساءا ....
اعود للحكايه حيث ان الرجل بعد ماصعق بسعر زجاجه الزيت وبأن 10 جنيهات مش
هتجيب عشاء ده هتجيب زجاجه زيت !!!

تشاجر مع البائع ..لكن سرعان ما انفضت المشاجره بتدخل الناس
الا ان الرجل مأساته لم تنتهى حيث ان الرجل بدلا من ان يتوجه الى بيته توجه الى النهر
وقذف فيه الزجاجه ثم قذف نفسه خلفها ومات الرجل غريقا ...
وهكذا انتهت رحله مصرى فى الحياه ....

أتعرف سيدى الرئيس :انك مسئول امام الله عن وفاه هذا الرجل البائس والعشرات من امثاله
الذين جعلتهم سيادتك يتفقون على الموت بدلا من الحياه فى ظل حكمك ......

سيدى الرئيس :الا تعرف انك ستحاسب على شهداء طابور العيش (38)الى الان , وشهداء
طوابير التموين وشهداء الغلاء مثل بطل قصتنا وطبعا شهداء العباره

سيدى الرئيس: يسعدنى ان اهنئ سيادتك بان نهايتك قربت ليس بسبب ثوره من شعبنا
البائس ولا من محاوله اغتيال ...ولكن نهايه عاديه تموت على فراشك كالبعير لست اقول
اشياء غيبيه بل لان سيادتك قد عمرت كثيرا وقد بلغت من الكبر عتيا ....

سيدى الرئيس : الاتعلم بأنك يوم القيامه سيشتكيك الى الله 78مليون مواطن ولن يسامحونك
يوم القيامه

سيدى الرئيس : حسبى الله ونعم الوكيل فيك وفى أتباعك

*****************************
تحديث

علمت انه وفى فرن العيش القريب من بيتنا حدثت مشاجره بسبب العيش بالسكاكين ادت الى

وفاه احد المتشاجرين واصابه اربعه اخرين على الاقل من الواقفين فى الطابور وان احد

المتشاجرين قام بخلع نقاب احد السيدات الواقفات فى الطابور فى الزحمه
ولا حول ولا قوه الا بالله

35 تعليق:

  • بنت الاسلام

    وفي هذا الامر

    لاتنتهي القصص

    ولن تنتهي

    وتحياتي

    لسيادة الرئيس

    تحية خالص من أوجاعنا والامنا لسيادته

  • Hosam Yahia حسام يحى

    بنت الاسلام

    شكرا على المرور

    هاوصل اوجاعك لسيادته

    حااااضر

  • د/اجدع بنوته

    كلكم راع وكلكم مسئول عن رعيته

    لاحول ولاقوة الا بالله

    تفقده الله برحمته

  • Hosam Yahia حسام يحى

    أجدع بنوته

    شكرا على المرور

  • al_qassam

    بسم الله
    حسام
    مش عارفه اعمل ايه ولا اقول ايه حسبى الله ونعم الوكيل فيك ايه الى انتا قلته دة انتا لسه صغير يابنى انتا استهبلت بطل سياسه واسكت وربنا هيشدوك ولو استمريت تشتم فيه كدة انا مش هدخل مدونتك تانى
    ماشى اتكلم عن الى بيحصل بس فى حاجه اسمها على لسان الحيوانات ياناصح
    زى كليه ودمنه ومحدش هيقول ايه الى انتا كاتبه
    استغفر الله العظيم وربنا انا خايفهخ عليك
    وبعدين فيها ايه لو كنت وصفت الى بيحصل والى كلنا عارفينو من غير ماتخبط كدة
    يلا اقول ايه
    ربنا يهدى الجميع ويهدى الحكام ويهدى الكل
    تقبل مرورى
    والله المستعان

  • عبالعزيز يوسف لسه بحلم

    المثل بيقول يافرعزن إيه فرعنك قال مش لاقى حد يلمنى

  • Hosam Yahia حسام يحى

    كتائب القسام

    شكرا لمرورك

    وتعليقك المفعم بالخوف و

    الجبببببببببببببن

  • دكتور حر

    ربنا يكرمك وياخده هو يا عم حسام

    اكتر حاجه بتضايق لما تلاقي بني آدم مخدر من الناس اللي اسمهم المصريين دول

    يقوله
    ايه يابااا
    كتر خيره
    بيأكل 80 مليون

    يا ولاد العبيطه

    طب ما تركيا 80 مليون
    والهند ربع مليار
    والصين مليار وشويه

    بلا خيبه


    ربنا يتولانا يا شيخ

    وربنا يكرمك

  • ikhwangeeee

    حااااجة والله يا عم تجيب السكر والضغط والموت ...


    كان في فى جرنال الدستور اليوم الى الحكومة هتستورد بتاع كدا بيتاكل الكيلو منه ب حاجة وتنمين الف جنية


    حاااجة تعل والله ....



    أخوكم إخوانى حتى النخاع
    http://ikhwangeeee.blogspot.com

  • al_qassam

    بسم الله
    اولا دة مش جبن ياخويا ثانيا دة خوف عليك وانتا حخر وحرمت انصحك تانى يلا المهم ليك تاج عندى تعالى خدو عكرت صفوة اللحظه ربنا يسمحك ال جبن ال ماشى ياعم خلينا ليك الشجاعه وانتا حر
    والله المستعان

  • سمية-بنت البنا-

    السلام عليكم ورحمة الله وبركاته

    المدون الفاضل ..حسام يحي..

    حسبنا الله ونعم الوكيل ..

    كم ألمني وأحزنني ما كتبتموه ..
    وكم أيقظ بداخلي نارا ...
    لن تنطفأ إلا بزوال الظلم والظالمين ..


    أخي الفاضل .. قد قارب الشعب علي الانفجار ...

    أخي الفاضل.. نحن بأيدينا النصر ..


    فلنبذل قصارنا جهدنا لاصلاح احوالنا ...

    بارك الله فيكم

    ___
    دعوة لمشاهدة ادراجي الجديد."انتخابات المحليات وذكريات من الماضي.."




    http://ikwan.maktoobblog.com

  • monaliza

    حسبنا الله ونعم الوكيل
    اللهم ارفع غضبك ومقتك عنا
    تفتكر اخى الفاضل ان كلامك ده بيوصله والجرايد والتليفزيون وكل حاجة ياترى هو عارف اللى بيحصل؟ياترى هو قاصد؟ يمكن تكون اسئلة ساذجة بس حقيقى مش قادرة اصدق انى اكون مسئولة عن حد واشوفه بيتبهدل كده ومعملوش حاجة
    مش يمكن ميعرفش!!!؟

  • فزلوكة

    مأساوية تلك القصة

    أين هو من سيدنا عمر وأبوبكر
    لكن أعود فأقول
    كانوا من كانوا فولى عليهم أبو بكر وعمر
    وصرنا هكذا الآن فولى علينا مثل هذا الرجل
    فلا عزاء لنا

  • Hosam Yahia حسام يحى

    دكتور حر

    شكرا على المرور

  • Hosam Yahia حسام يحى

    اخوانجىىىىىىىىىىى

    شكرا على المرور

  • Hosam Yahia حسام يحى

    كتائب القسام

    شكرا على المرور

    انصحينى ماشى لكن ماتبقاش النصيحه تخويف

    ولا ايه

    الموضوع مش ناقص خوف

    وعلى راى واحد

    انا مش هخاف المره دى ضاع من عمرى سنين فى الخوف

    وموضوع التاج اعذرينى استنى قدام شويه

  • Hosam Yahia حسام يحى

    سميه بنت البنا

    شكرا على مرورك

    وموضوعك الجديد رائع ماشاء الله

  • Hosam Yahia حسام يحى

    monaliza

    شكرا على المرور

    طبعا مابيوصلوش
    انا متاكد خمسه مليون فى الميه
    انه مابيوصلوش اى حاجه الا تقارير امنيه

    لكن باحسس نفسى انه بيوصلوا

    حاجه يعنى بارضى بيها غريزه فى نفسى
    هههههههه

  • Hosam Yahia حسام يحى

    فزلوكه

    شكرا على المرور

  • السيفان

    قوم اصحى يا شعب مصر دا زجاجه الزيت بعشره جنيه والعدس بقى بعشره جنيه
    تحياتى لك اخى حسام بوست رائع بيعبر عن اللى بيحصل وافران العيش مشكلها كتير وزى ما انته ذكرت ناس قتلت على افران العيش
    فاران العيش دائما عليها مشاكل فلا يوجد يوم يمر على افران العيش بدون مشاكل
    ربنا يبارك فيك اخى حسام ويحفظك وشهاده حق انته افضل مدون شوفته

  • Hosam Yahia حسام يحى

    السيفان

    شكرا لمرورك


    ايه ياعم اللى انتا بتقوله ده

    انا أحسن مدون ليه الدنيا خلصت

    يبقى انتا لسه مالفتش فى المدونات كويس

    وعلى العموم شكرا ياباشا انتم اخجلتم تواضعنا المتناهى المتوازى

  • only spot

    السلام عليكم
    اولا تحياتى على سردك
    ثانيا معتقدش ان الحل الانتحار للهروب من نار هولاكو
    فكرتنى بالمسيح الدجال ولعنته وان جنته نار وناره جنه صدقنى احنا محتاجين الصبر والايمان بالله عشان نقدر تقاوم والامل ان بعد الظلام نهار ساطع
    اللهم اكفنا الكفر والفقر
    تحياتى

  • Hosam Yahia حسام يحى

    only spot

    شكرا لمرورك

    وانا معاكى ان الانتحار مش حل طبعا

    بس قلت القصه ........يمكن عشان حبيت اقول ان موضوع الغلاء ليه تأثيرات على الشعب

    بس
    ده اللى كان قصدى

  • بذرة امل

    سمعت خبر بيقول ان وزير التموين قال ان ازمة طوابير العيش هتنتهى فى شهر اربعة اللى هو كمان اسبوعين

    اول مرة اسمع القصة دى بس بجد اثرت فيا جدا

    حسبنا الله ونعم الوكيل

  • Hosam Yahia حسام يحى

    بذره امل

    شكرا على مرورك

    وزير التموين بيكلم عن بلد تانيه على ما اعتقد غير مصر

  • دواير

    مش هقول غير حاجة واحدة بس,....ربنا يجازي اللي كان السبب..ويرحمنا برحمته

  • Hosam Yahia حسام يحى

    دواير

    شكرا على مرورك

  • بنوته مصرية

    لاحول ولاقوة الا بالله

    حسبي الله ونعم الوكيل


    ربنا يخده بقي خلينا نستريح منه

    زمان كنت بسمع الاسعار زادت مش عارفة كام قامت مظهرات وحرقو القاهرة

    ليه احنا سلبين كدا وساكتين

    تحياتي لك
    رودي

  • Hosam Yahia حسام يحى

    رودى

    شكرا على مرورك

    وفعلا احنا سلبيين بطريقه غبيه

  • عاشقه الاقصى

    مش هنقول غير حسبى الله ونعم الوكيل

    بجد الناس طفح بيها الكيل

    انا بيتهيالى ان الناس هتتجنن

    بوست رائع

    وابقى سلمليى على سيادته

    وصدقا طفح الكيل
    عاشقه الاقصى

  • Hosam Yahia حسام يحى

    عاشقه الاقصى

    شكرا على مرورك

    وحاضر هوصل سلامك

  • محمد مارو

    حسام

    عجبنى اوى افران العيش و توابعها دى

    المهم

    يا بخت مبارك يوم القيامه ده هياخد ضرب يابوووووووووووووووى

    ضرب لما قفاه يورم

    يا رب اتحاسب قبله اصل حسابه هيطول اوووووووووى

  • Hosam Yahia حسام يحى

    محمد مارو

    شكرا على المرور


    فعلا احنا حنتحاسب قبله ان شاء الله

    لان الفقراء هيتحاسبوا الاول

    واحنا بالنسبه له فقراء اوووووى

  • ola_barakat

    الصديق حسام يحي:
    موضوعك مؤلم بجد
    بس الراجل ده كان ممكن يشتري شويه طعميه وفول وعيش وهو كان حايتقتل ف طابور العيش وخلاص بدل ما يموت نفسه بالطريقه دي
    مافيش حد منهم حاسس بحد منا احنا بالنسبه لهم مش موجودين اصلا يبقي حايفكروا فينا ازاي بقي
    كفايه عليهم الخمسه ف الميه الاغنيا اللي واخدين كل حاجه
    دي سياسه انهم يقتلوا الناس بالسموم والباقي يقتلوا بعض لاي سبب ويخلصوا من الشعب الفقري ده وساعتها يستوردوا شعب من بره رايق ونضيف
    بس ياخوفي يجوا يستوردوا شعب من بره مايلاقوش حد يرضي انهم يحكموه
    تحياتي
    علا بركات

  • مصر اللى مشفتهاش

    سبحان الله ..
    سيدنا عمر بن الخطاب قال"لو عثرت بغله بالعراق لسألنى الله تعالى عنها لما لم تمهد لها الطريق ياعمر"

    عثرت بغلة .. مش انتحر ولا مات 13 ..

    الناس ديه هيبقى حسابها مع ربنا جامد اوى .. انا مش عارفة هما مش عارفين ان ليهم نهاية ولا مستكبرين على اخرتهم ..

    وبالنسبة للنهاية مع الناس الغلابة دول هتبقى يا انتحار يا انفجار.. واعتقد ان التانية نسبتها أكبر لاننا الحمدلله شعب مازلت القاعدة العريضة فيه متدينين..

    عائشة


لو صندوق التعليق مش ظاهر ممكن تعمل ريفرش

next previous